Tgi che nus essan

Nus essan l’instituziun naziunala independenta per ils dretgs umans da la Svizra. Nus lavurain sin basa dals princips da Paris da las Naziuns Unidas / ONU. Quels pretendan da francar l’instituziun sin il stgalim da la lescha u da la constituziun, in mandat cumplessiv per la protecziun e la promoziun da tut ils dretgs umans, l’independenza da l’instituziun, spezialmain era dad autras instituziuns, da la regenza e dals parlament, ina cumposiziun pluralistica ed ina finanziaziun publica suffizienta.

Per tge che nus ans engaschain

Dretgs umans èn dretgs che mintga uman ha sin basa da ses esser uman. Els han in dretg da valur universal e garanteschan la dignitad umana. Dretgs umans protegian las premissas centralas da l'existenza umana ed ils aspects essenzials da la persunalitad da mintga individi.

Dretgs umans garanteschan ch'ils umans possian sa participar a moda eguala a la societad, a l'economia ed a la politica. Perquai èn ils dretgs umans pitgas fundamentalas da l'urden statal e da la convivenza sociala.

Els ston vegnir sviluppads vinavant da maniera dinamica en vista als svilups da la societad.

Ils dretgs umans èn princips elementars e princips da furmaziun dal stadi da dretg. Els imponan a tut ils organs statals in'obligaziun da respectar e da proteger lur cuntegns e da procurar ch'els vegnian applitgads en l'entir urden da dretg.

Sco instituziun svizra independenta per ils dretgs umans contribuin nus a la protecziun ed a la promoziun dals dretgs umans en tut ils secturs da la vita e sin tut ils stgalims statals en Svizra. Cun tut ils meds che ans stattan a disposiziun ans engaschain nus per ch'ils dretgs umans da tuts, en spezial er da persunas ch'èn vulnerablas e dischavantagiadas vegnian respectads e protegids.

Tge che nus faschain

Nossas incumbensas francadas da la lescha cumpiglian l'infurmaziun e la documentaziun, la perscrutaziun, la cussegliaziun, la promoziun dal dialog e da la collavuraziun, la furmaziun en connex cun dretgs umans e la sensibilisaziun sco er il barat internaziunal.

Per mauns dal stadi, da la societad, da la politica e da l'economia analisain ed infurmain nus davart l'impurtanza, l'observaziun e la realisaziun dals dretgs umans en Svizra. Nus documentain, sclerin, inditgain largias, mussain pussaivladads da meglierament, iniziain il dialog ed il svilup ed ans  participain a la debatta politica. Nus contribuin al barat tranter actur(a)s local(a)s dals dretgs umans, la politica, l'economia e la societad ed ans participain sin plaun internaziunal a la concepziun ed a la promoziun dals dretgs umans.

Nus collavurain globalmain en il rom da la Globale Alliance of National Human Rights Institutions (GANHRI) e sin plaun europeic en il rom dal European Network of National Human Rights Institutions (ENNHRI) cun autras instituziuns naziunalas per ils dretgs umans.

Co che nus lavurain

• Da maniera independenta ed autonoma
  Nus essan politicamain, instituziunalmain ed ideologicamain independents e determinain da maniera autonoma accents tematics e l'utilisaziun da nossas resursas. Nus agin senza pregiudizis, cun responsabladad e da maniera consequenta.

• Da maniera  cumpetenta e basada sin l’evidenza
  Nus avain en mira in aut grad da qualitad e da professiunalitad en tut ils champs da nossa activitad. Nus lavurain sin basa da datas empiricas, da resultats da retschertga scientifica e da fundaments giuridics naziunals ed internaziunals.  

• Da maniera transparenta ed inclusiva
  Nus infurmain a moda sincera, intenziunada, clera e chapibla. Nus dain pled e fatg publicamain davart nossas activitads e vulain pussibilitar a tut las persunas interessadas l'access ad infurmaziuns relevantas.

• Da maniera cooperativa e multifara
  Nus essan averts per il dialog cun tut las gruppas da la populaziun. Nus cooperain cun autoritads sin nivel federal, en ils chantuns ed en las vischnancas, cun la scienza, cun la societad civila e cun l’economia. Nus lavurain  cun persunas pertutgadas ed essan en barat cun noss commembers e cun nossas gruppas en mira.

• Da maniera engaschada ed efficazia
  Nus essan conscients da l'impurtanza e da la responsabladad da noss'incumbensa. Nus vulain cuntanscher resultats concrets ed iniziar midadas giuridicas e socialas en il senn d'ina protecziun cumplessiva dals dretgs umans.

• Da maniera orientada al svilup e  reflectada
  Nus essan in'organisaziun en svilup e tschentain prioritads. Noss team vegn ad esser pli multifar e pli inclusiv, nossas resursas vegnan a crescher. Noss spazi d'agir vegn a crescher, nossas furmas da lavur vegnan a sa sviluppar. Svilup munta per nus emprender, empruvar, examinar, reflectar e meglierar da maniera permanenta.

Quest profil directiv è vegnì approvà da la suprastanza da l’Instituziun svizra per ils dretgs umans ils 21 da december 2023.